કાગડા અને પીંડભોજન !

 

 

કાગડા અને પીંડભોજન !

કાગડો કાંણો, ‘ને તેમ છતાં એ શાણો,……..(૧)

કાગડાનો દેહ કાળો ‘ને  એ કોઈનો નથી વ્હાલો,….(૨)

કાગડાને બુમો પાડી લોકો ભગાડે, ‘ને  શ્રાધ્ધક્રિયા ના ભોજન માટે પ્રેમથી બોલાવે,……(૩)

કાંઈ સમજાતું નથી, આ માનવીઓનું ભેજું ‘ને ચંદ્ર મુજવણૉમાં કે હવે શું કહેવું ?……….(૪)

રામ કથામાં, કાગડા ‘કાગભુસંડી’ સ્વરૂપે ‘ને કાગપૂજન કરે સૌ જગતમાં આવા સ્વરૂપે,……(૫)

બાળવાર્તામાં કાગડો  કહેવાયો  કાળો, ;ને પથ્થરો મુકી, ગાગરપાણી પી કહેવાયો શાણો,…….(૬)

જોડ્યો કાગડાનો સબંધ પ્રિતુઓ સાથે, ‘ને  રિવાજ એવાનું કારણ શોધવા ચંદ્ર છે આજે,…….(૭)

ઈનટરનેટ પર જઈ, કાગ કહાણીની શોધમાં, ‘ને પીંડ ખવડાવવાનો પુરવો ના મળ્યો એ શોધમાં,……(૮)

પણ, કાગ પિંડભોજનની અજાણતા રહી, ‘ને કલ્પનાઓમાં ચંદ્ર-વિચારધારા વહી,……..(૯)

કહેવાય કે મૃત્યુ પ્રતિક યમરાજા છે કાળા, ‘ને કાગડાઓ પણ દેહ થકી રહ્યા કાળા,…….(૧૦)

નિહાળ્યો કાગને એવા જ સબંધે, ‘ને પડ્યો હશે  રિવાજ યમ પ્રતિનિધી જેવા સબંધે,……(૧૧)

જાણે કે કાગડો આવી પીંડભોજન સ્વીકારે, ‘ને યમરાજ કરી દયા જીવને ઉગારે,………(૧૨)

હોય કાગ કહાની આવી ખરી કે ખોટી, ‘ને જાણવા સત્ય જવાબદારી રહે મોટી,………(૧૩)

કહાનીમાં અહી લાવ્યો ચંદ્ર સૌને, ‘ને જાણજો સત્ય ‘ને ચંદ્ર વિનંતી રહે સૌને !……..(૧૪)

કાવ્ય રચના તારીખઃ નવેમ્બર,૧૯,૨૦૧૧                                  ચંદ્રવદન

બે શબ્દો…

આજની કાવ્ય-પોસ્ટ વાંચતા, કંઈક નવું લાગ્યું ?

આ રીતે લખવાનો મારો પ્રથમ પ્રયાસ છે !

અહી, “છંદ” કે અન્ય કાવ્ય નિયમોનું પાલન થયું નથી.

આ જે કંઈ શક્ય થયું એને તમે “ગમે તે નામ” આપી શકો છો.

આ રચનાનું “મૂળ” છે એક ઈમેઈલ.

નવેમ્બર,૧૮,૨૦૧૧ના દિવસે, મારા “કઝીન” (Cousin) ભીખુભાઈ મિસ્ત્રીનો એ ઈમેઈલ હતો, અને વિષય  હતો “પ્રિતૃદેથી V.R.S.”હિન્દુ ધર્મમાં શ્રાધ્ધપૂજન સમયે ચાલી રહેલા  કાગડાઓને “પીંડભોજન”ના રિવાજ પર હાસ્યભાવે કટાક્ષમાં એક પત્રરૂપી સંદેશો  હતો. જે નીચે મુજબ છે>>>>

વિષય: પિતૃપદેથી V.R.S. આપવા બાબત.

કાગડા કોમ્યુનીટી નો ઈ-મેઈલ: પિતૃપદેથી V.R.S. આપો.

ચેનલોવાળાએ આ ભાદરવામાં આતંકવાદીના ધમકીભર્યા ઇ-મેલ ખૂબ ચલાવ્યા. આવો જ એક ધમકીભર્યો ઇ-મેલ kagadacommunity@kagavas.com પરથી મારી ઉપર આવેલો છે. જેમાં કોઇ પણ શબ્દના ફેરફાર વગર સમગ્ર કાગડાઓની વેદના-વ્યથાકથા આપના સુધી શબ્દશઃ પહોંચાડી રહ્યો છું.

To,

આદરણીય મનુષ્યો, (તમામ જ્ઞાતિ, તમામ ધર્મ)

શ્રાદ્ધપક્ષના દિવસો ચાલી રહ્યા છે અને નાછૂટકે તમને આ અરજન્ટ ઇ-મેલ કરવો પડ્યો છે. જેનો તાત્કાલિક અમલ કરવા હું ‘અખિલ વિશ્વ કાગડા કોમ્યુનિટી’ તરફથી સમગ્ર  માનવજાતને આ વિનંતિસહ ધમકી પાઠવું છું. તમે માણસો કયા બેઇઝ ઉપરથી અમને  પિતૃઓ ગણો છો? આ મુદ્દે અમારા પક્ષીસમાજમાં ખૂબ મોટા ઝઘડાઓ થઇ ગયા છે. એક  તો એકેય બાજુથી તમે લોકો કાગડા જેવા લાગતા નથી. કાગડા હોવાનો પ્રથમ નિયમ એ  છે કે જેવા અંદર હો એવા જ બહાર દેખાવું પડે,

અને જે ગુણ તમે કદી આત્મસાત્ કરી શકતા નથી. ઊલટાનું તમે તો સફેદ કપડાં પહેરીને કાળા ધંધા આદરો છો. જે ગુણ બગલા સાથે મળતો આવે છે. તો આપ સર્વે મનુષ્ય  સમાજને વિનંતી છે કે બગલા અથવા વાંદરાને આપ ખીર ખવડાવો. આમેય ગયા ભાદરવે  તમે લોકોએ જે ખીર ખવડાવી એમાં પાવડરના દૂધની ખીર ઉડાડી’તી એટલે અમારી  નાતમાં ત્રણ હજાર અને બસ્સો જેટલા કાગડાઓને ઝાડાઊલટી થઇ ગયા’તા. વળી અમારે  તો તમારી જેમ ઇમરજન્સી ૧૦૮ જેવી વ્યવસ્થા પણ ન હોય. તમારા પિતૃઓની તો ખબર  નથી પરંતુ ગયા ભાદરવે તમારી ભેળસેળવાળી ખીરથી અમારા ૨૧૫ જેટલા કાગડાઓ અવસાન પામીને પિતૃ થઇ ગયા. જેમનાં સંતાનોને રહેમરાહે નોકરી આપવામાં અમને ફીણ આવી ગયાં.

આથી અમે કાગડાઓએ ઓણ નક્કી કર્યું છે કે તમે લોકો ગમે એટલા ખીરના લોંદા ઉડાડો  તોય અમે કોઇ આ વર્ષ તમારી અગાસી ઉપર ફરકવાના નથી. બીજી બહુ અગત્યની વાત કે  ભાદરવા માસમાં અમારી કાગડીઓ બચ્ચાંને જન્મ આપે છે. એ બચ્ચાંના આહાર માટે જે તે સમયે તમારા વડવાએ આ ખીર ખવડાવવાનો ‘રિવાજ’

શરૂ કર્યો હતો. આ એક પક્ષીપ્રેમનું ઉત્કૃષ્ટ ઉદાહરણ હતું. હવે તમે લોકો એને  પિતૃઓ સાથે જોડી અમને ઇમોશનલી બ્લેક મેઇલ કરવાનું બંધ કરો તો સારું. અમારી  કાગડાની આખી જ્ઞાતિનું મુખ્ય કામ સમાજમાંથી કચરો દૂર કરવાનું છે અને તમારી  આખી જ્ઞાતિ આ સિદ્ધાંતથી વિરુદ્ધ ધરતી ઉપર કચરો વધારવાનું કામ કરી રહી છે. જેનાથી અમને ખૂબ ઠેસ પહોંચી છે.

અત્યાર સુધી અમે તમારી જ્ઞાતિને ઘણા બધા મુદ્દાઓ પર માફ કરી છે. જેમ કે, તમે  તમારાં સંતાનોને ‘કાગડો કા કા કરતો આવે’ આવાં જોડકણાં અને ગીતો અમારી પૂર્વ પરવાનગી વગર વર્ષોથી ગવડાવ્યાં કરો છો. ‘જુઠ બોલે કૌઆ કાટે, કાલે કૌએ સે  ડરીઓ’ આ ગીતકારને પણ અમારી જ્ઞાતિવિરુદ્ધ અપમાનજનક ટિપ્પણી કરવા બદલ અમે  માફ કર્યો છે. તો પેલો દલેર મહેંદીએ ‘સચ બોલ કાલા કૌઆ કાટ ખાયેગા’ આવું  ગાઇગાઇને કરોડો રૂપિયા બનાવી લીધા ને અમને રોયલ્ટી પેટે કશું નથી મોકલ્યું. હોરર ફિલ્મ ‘ફૂંક’ વાળા ઉપર તો અમારો યુવા કાગડા સમાજ ધૂંઆપૂંઆ છે. એકમાત્ર કવિ રમેશ પારેખે ‘કાગડો મરી ગયો’ આ કવિતામાં અમારી વેદનાને વાચા  આપી જે બદલ સંસ્થા એમનો આભાર માને છે. તમારી આખી દુનિયામાં માણસ એક જ છે ને એ છે બિલ ગેટસ. જેને પોતાની કંપની ‘માઇ-ક્રો-સોફટ’ નામ રાખ્યું એમાં ક્રો (કાગડો) આવતું હતું એટલે તેમણે અમારા સમાજને રોયલ્ટી પેટે કરોડો રૂ. મોકલ્યા. જેમાંથી આજ અમારી યુવા પેઢી કમ્પ્યુટર શિક્ષણ લઇ રહી છે. ત્રીજી  વાત ‘કાગડો આવવાથી મહેમાન આવે છે’ આવી ખોટી અફવાઓ ન ફેલાવો યાર, અમુક  લોભીયા’વના ઘરે તો અમે લોકોએ પણ જવાનું બંધ કર્યું છે.

અંતમાં સમગ્ર કાગડા કોમ્યુનિટી વતી પ્રાર્થના છે કે અમે લોકો તમારા પિતૃ પદેથી V.R.S લેવા માંગીએ છીએ. તમારાં કારનામાંઓથી કંટાળીને અમારી જ્ઞાતિએ આ  નિર્ણય લીધો છે. અમને માફ કરજો અને આ ભાદરવે અમારી રાહ ન જોતા.

છેલ્લી મફત સલાહ કે તમે માણસો પિંડદાન, પિતૃતપર્ણ અને પિતૃમોક્ષ માટે મા-બાપના  મર્યા પછી જેટલો ખર્ચો કરો છો એનાથી અડધો જો જીવતાં મા-બાપને સાચવવામાં કરો તો કદાચ તમારા પિતૃઓને જીવતાં જ મોક્ષ મળી જાય. આ મેઇલ મળ્યા પછી પણ જો  તમે ‘કાગ-કાગ’ની રાડો પાડશો તો ન છુટકે અમારે સુપ્રીમ કોર્ટનાં દ્વાર  ખખડાવવાં પડશે અને માનહાનિનો દાવો માંડવો પાડશે. સહકારની શ્રદ્ધા સાથે.

સૂચનાનો અરજન્ટ અમલ કરવા વિનંતી.

આ લેખ વાંચ્યા બાદ, મારા મનમાં અનેક વિચારો રમવા લાગ્યા. મને “રિવાજ” વિષે પુરૂ જ્ઞાન નથી. મારી સમજ પ્રમાણે, કાવ્યરૂપે કંઈક લખવાનો નિર્ણય  લીધો. પ્રથમ લીટી કરતા, ” ‘ને” સાથે  બે વિચારોનું જોડાણ હતું, અને છેલ્લા  શબ્દો “રાઈમ”(Rhyme) થતા નિહાળતા, બધા જ વાક્યો એ પ્રમાણે લખવાનો વિચાર  કરી, આ રચના પુર્ણ કરી. આજે એને પોસ્ટરૂપે પ્રગટ કરી છે.

તમોને આ “નવું લખાણ” કે રચના ગમશે એવી આશા.

આ “નાવા પ્રયાસ” માટે જરૂરથી પ્રતિભાવ આપશે ને ?

ડો. ચંદ્રવદન મિસ્ત્રી.